Зәйдән Гөлфия Шәйхразиева эремчекле күмәч пешерергә өйрәтә

Касәдә 300 мл җылы сөт, 3-4 аш кашыгы шикәр комы, 12 грамм коры чүпрә, 2 аш кашыгы бал, 50 мл үсемлек мае, тоз һәм ванилин салып, болгатырга. Иләп он салырга һәм йомшак камыр басып куярга. Бер сәгатькә кабарырга калдырырга.

Эчлек өчен 350 грамм эремчек, 2-3 аш кашыгы  шикәр комын һәм ванилинны блендер белән изәргә. Йөзем өстәргә була.

Камырны 2-3 мм калынлыкта җәяргә, йомшартылган атланмай белән майларга, аннары эремчекне салып чыгарга кирәк. Рулет формасында төреп, кырыйларын капларга. 3 см калынлыкта кисеп, бер ягын онда әвәләргә. Пергамент кәгазе җәелгән табага тезеп, тастымал белән каплап 25 минутка калдырырга. Аннары күмәчләрне күпертелгән чи йомырка белән майларга һәм 180-190 градус мичтә 25 минут пешерергә.

Тәмле булсын!