Зәйдә мобилизацияләнгән егетләр һәм аларның гаиләләренә ярдәм күрсәтелә

Шәһәрдә мобилизацияләнгән гаиләләргә активистлар беркетелде. Һәр гаилә белән без даими аралашып торабыз һәм аларның үтенеч-мөрәҗәгатьләрен үтәргә тырышабыз. Мәсәлән, шәхси секторда яшәүче берничә кешене утын һәм йорт хайваннарын ашату өчен азык белән тәэмин итә алдык. Кайбер йортларда түбә ремонтланды. Кредит каникуллары алу һәм банк буенча башка сораулар белән мөрәҗәгатьләр дә күп булды. Бу проблемаларны чишү өчен һәр гаилә белән аерым эш алып барылды. Аналар көне уңаеннан мобилизация буенча чакырылган егетләрнең әниләренә азык-төлек җыелмалары тапшырылды, ә хәзерге вакытта балаларга Яңа ел бүләкләре әзерлибез.
Мобилизацияләнгән гаиләләр белән хезмәттәшлек дәвам итә, безгә кергән сорау-мөрәҗәгатьләр хәл ителә.