Зәй офыклары

Эш белән мәшгуль булсаң...

Җәйге каникулларда студент яшьләрне мәшгуль итүгә булышлык күрсәтү яшьләр эшләре идарәсенең үстерелешле юнәлешләренең берсе булып тора. Бу, беренчедән, студентлар хезмәт отрядлары эшчәнлеген үстерү буенча дәүләт сәясәтен тормышка ашыру максаты булса, икенчедән, район яшьләрен хезмәт белән тәрбияләп, социаль тискәре күренешләргә каршы эшчәнлек алып бару да. Шуңа да елдан-ел зәйлеләрне студентлар хезмәт...

Җәйге каникулларда студент яшьләрне мәшгуль итүгә булышлык күрсәтү яшьләр эшләре идарәсенең үстерелешле юнәлешләренең берсе булып тора. Бу, беренчедән, студентлар хезмәт отрядлары эшчәнлеген үстерү буенча дәүләт сәясәтен тормышка ашыру максаты булса, икенчедән, район яшьләрен хезмәт белән тәрбияләп,

социаль тискәре күренешләргә каршы эшчәнлек алып бару да. Шуңа да елдан-ел зәйлеләрне студентлар хезмәт отрядларына мөмкин кадәр күбрәк җәлеп итү юллары эзләнә. Эш торышы, агымдагы елда бу юнәлештә нәрсәләр планлаштырылуы турында без яшьләр эшләре идарәсе каршындагы студентлар хезмәт отрядлары үзәге җитәкчесе Артур Камалюков белән сөйләштек.

- Артур Олегович, студент яшьләрне вакытлыча хезмәт урыннары белән тәэмин итүдә нинди уңай нәтиҗәләр күзәтелә? Безнең районда нинди студентлар хезмәт отрядлары популяр?

- Сер түгел, урта һөнәри яки югары белем алган яшь кешене укуын тәмамлауга, оешма-предприятиеләрдә колач җәеп көтеп тормыйлар. Бу беренче чиратта предприятиеләргә беренче көннән эшкә кереп китәргә сәләтле хезмәткәрләр кирәк булу белән бәйле. Хезмәт базарында яшь белгечләрнең социаль-хезмәт адаптациясе түбән булуы билгеләнә. Студент чакта үзеңне хезмәттә сынап карау комачауламый, бу коллектив белән эшләргә өйрәнүгә, куелган максатны бергәләп үтәүгә күнектерә. Моннан тыш, буш вакытын хезмәттә уздырган студентның наркотиклар белән мавыгырга, эчүчелеккә бирелергә, төрле негатив күренешләргә тартылырга да вакыты калмый. Узган ел, мәсәлән, районда төрле студентлар хезмәт отрядларында эшләүгә 312 яшүсмер җәлеп ителде. Без бигрәк тә политехник колледж студентларын эшле итүгә игътибар бирдек. Үткән ел 34 егет-кыз республика балалар сәламәтләндерү лагерьларында әйдаманнар буларак эшләде. Төрле төзелеш эшләрендә 40 яшүсмер катнашты. Төзелеш отрядлары нигездә Татарстанда юллар төзелешендә эшләде. "Урман патруле" отряды составында 15 студент Лаеш районындагы тыюлыкны чистартты. 7 студент ерак араларга йөрүче поездларда проводниклар булып хезмәт куйды. Болар - республика тарафыннан оештырылган отрядлар.

Без үзебезнең районда да студентлар хезмәт отрядларын булдырдык. Алар - ишегалды мәйданчыкларында эшләүче әйдаманнардан, яшелләндерүчеләр һәм кыр эшләрендә катнашучы егет-кызларыбызны берләштергән "Зубр" отрядлары. Шунысы куанычлы, елдан-ел каникуларда эшләргә теләүче студентлар саны арта. 2013 ел белән чагыштырганда, 2014 елда бу сан 9 процентка артты. Ә быел исә 500ләп яшүсмерне эшле итү планлаштырыла.

-Нәрсә бәрабәренә арттыру булачак?

- Бөек Җиңүнең 70 еллыгы уңаеннан "Без янәшәдә" дип аталган яңа хезмәт отряды эшчәнлеген башлады. Отрядта 10 кыз, 5 егет сугыш ветераннары, тыл хезмәтчәннәренә өйләренә барып, җыештыру, ватылган әйберләрне төзәтү, хуҗалык эшләрендә булыша. Алга таба бу эшне авылларда да оештырырга ниятлибез. Без социаль авыр хәлдәге гаиләләрдәге студентларга аеруча игътибар итәбез. Мәсәлән, күптән түгел Чаллы һөнәри белем бирү учреждениесен, уку өчен түләргә акчалары җитмәү сәбәпле, ташлап кайткан бер студент хокук бозу юлына баса һәм җәза үтәтү инспекциясенә беркетелә. Бу хакта безгә инспекциядән хәбәр иткәч, без аны автомойкага эшкә урнаштырдык. Бер яктан, ул эшле булды, икенче яктан, хезмәткә өйрәнә, автосервис хезмәткәрләре әйтүенчә, ул хәзер эш сәгатеннән соң да, автосервис эшчәнлеге белән кызыксынып, өйрәнергә кала икән. Бәлки алга таба менә шундый категория яшьләрдән дә хезмәт отряды туплау мөмкин булыр.

- Быелгы җәйдә студент яшьләребезгә нинди хезмәт отрядларына урнашу мөмкинлеге бар?

- Җылы якларга йөрүче поездларга проводниклар булып урнашырга теләүчеләрдән гаризалар кабул ителә. Отряд туплангач, Казаннан килгән махсус белгечләр май аенда укулар үткәрәчәк. "Урман патруле" отряды август аенда урманнарны чистарту эшендә катнаша. Быел без Урман хуҗалыгы министрлыгына мөрәҗәгать белән чыгып, бу эшне үзебездә башкарырга рөхсәт бирүләрен сорыйбыз. Рөхсәт алганда, бу, һичшиксез, отрядка студентларны күпләп туплау мөмкинлеге бирәчәк. Төзелеш отрядларына да яшьләрне җыябыз. Монда исә республикада баручы төзелеш эшләрендә катнашу күздә тотыла. Педагогик отрядлар, исеменнән үк күренгәнчә, ял лагерьларында балалар белән эшләүне, шәһәрне яшелләндерү отрядлары газоннарны, паркларны тәртиптә тотуны, "Зубр" отряды авыл хуҗалыгында кыр эшләрендә катнашуны үз эченә ала.

Следите за самым важным и интересным в Telegram-канале Татмедиа


Нравится
Поделиться:
Реклама
Реклама
Комментарии (0)
Осталось символов: