Зәй офыклары

Зәйдә әфганчыларга багышланган чаралар үтте (фотолар)

Бүген Совет гаскәрләренең Әфганстан җиреннән чыгарылуына 26 ел. Шул уңайдан Зәй районында да тантаналы чаралар үтте. Әфганчылар, кайнар нокталарда хәрби хезмәт үткән райондашларыбыз, аларның якыннары, балалары, шәһәр мәктәпләре укучылары традицион төстә бу көнне «Азатлык китерүче солдат» һәйкәле янына җыелды, һәйкәл каршына чәчәкләр салды, кайнар нокталарда ятып калган Зәй егетләрен бер...

Бүген Совет гаскәрләренең Әфганстан җиреннән чыгарылуына 26 ел. Шул уңайдан Зәй районында да тантаналы чаралар үтте. Әфганчылар, кайнар нокталарда хәрби хезмәт үткән райондашларыбыз, аларның якыннары, балалары, шәһәр мәктәпләре укучылары традицион төстә бу көнне «Азатлык китерүче солдат» һәйкәле янына җыелды, һәйкәл каршына чәчәкләр салды, кайнар нокталарда ятып калган Зәй егетләрен бер минут тынлык белән искә алды. Шәһәрнең Җиңү Бульвары паркында Әфганстан, Чечня һәм башка кайнар нокталарда хәрби бурычын үтәгәннәр турында искәртеп танк тора, аңа беркетелгән истәлек тактасында 470 Зәй егетенең менә шушы сугышларны үз җилкәсендә кичерүе мәңгеләштерелгән. Алар арасыннан 10 сы туган төбәгебезгә үз аяклары белән кайта алмады. Әмма без аларны һәрвакыт искә алып, хәрби бурычларына тугъры булулары хакында буыннан-буынга җиткерергә бурычлыбыз. - Мөхтәрәм әфганчыларыбыз, Чечняда хезмәт иткән егетләребез ул чорда сез яулардагы батырлыгыгыз белән бер үрнәк булсагыз, хәзер исә төп эшегездән бушаган арада яшь буынны патриотик тәрбияләүгә җитди өлеш кертәсез. Бөек Җиңүгә 70 ел якынлашкан бу көннәрдә мондый эшчәнлек аеруча мөһим, актив, батыр ир-егетләребез белән без горурланабыз, - диде шәһәр Советы рәисе урынбасары Марсель Хуҗин, тирән хөрмәт хисләрен җиткереп. Тантаналы митингтан соң ветеран әфганчылар, кайнар нокталарда хәрби хезмәт үтүчеләр шәһәр буйлап, һәлак булганнар хөрмәтенә куелган мемориаль такталарга чәчәкләр куеп чыктылар, вакытсыз гомерләре өзелгәннәрне якты хатирәләр белән искә алдылар. Марат Кәбиров, Алексей Чернов, Владимир Кухарев һәм башкалар зәйлеләр күңелендә кабат яңарды. Ә яшьләр эшләре идарәсе әзерләгән бу истәлекле көнгә багышланган чарада, район баш хәрби комиссары Айрат Әгъләмҗанов үткән ел совет гаскәрләрен Әфганстан җиреннән чыгаруга 25 ел тулуга багышлап махсус медальләр чыгарылуын әйтеп, аларның районда яшәүче һәр 152 әфганчыга да тапшырылачагын белдерде. Чарада катнашучыларның кайберләре күкрәгенә медальләр кадады. « Сугышчан дуслык» ( «Боевое братство») иҗтимагын оешмасы рәисе Сергей Хватковка, Олег Спиридоновка актив патриотик эшчәнлек алып барулары өчен махсус күкрәк билгеләре тапшырды. Бу эштә шулай ук аеруча активлык күрсәтүче Николай Коронов, Данил Уразайкин, Андрей Иванов, Юрий Павлов иҗтимагый оешманың Рәхмәт хатлары белән бүләкләнде. Чечняда хезмәт иткән Юрий тантаналы чарага уллары Артем һәм Максим белән килгән иде. - Без ел саен малайлар белән бергә чыгабыз бу көнне үткәрелгән чараларга. Теләгем улларым өлкәннәрнең сугышчан батырлыгын, дуслыгын күреп үссеннәр, илебезнең патриотлары булсыннар, - ди Юрий. Әтисенә Рәхмәт хаты тапшырганда 4 яшьлек Максимнан да ныграк шатланучы булмады, горурланып, кызыгып күзәтте ул аны. Бүген инде арабызда булмаган егетләрнең туганнары, якыннары да килгән иде кичәгә. Поповка алыннан килгән Ульяна һәм Николай Утягановлар уллары Валерийны яшьтәшләренең даими искә алып торуларыннан канәгать булуларын белдерделәр. - Элегрәк без улларын хәрби хезмәттән исән-имин каршы ала алмаган аналар бергә җыелышып, йөрәк парәләребезне искә ала, каберләренә йөрешә идек, хәзер олыгаелды инде, ә менә Әфган, Чечняны үткән егетләрнең даими төстә улларыбыз каберләренә эзләрен суытмауларына рәхмәтлебез, алга таба сугышлар күрергә, кадерлеләрен беркемгә дә югалтырга язмасын, - дип күз яшьләрен сөртте Ульяна Петровна. Әйе, сугыш дигән куркыныч сүз кабат яңгырамасын. Кичә барышында әлеге темага яңгыраган җырларны тыңлаганда да әфганчылар, Чечня сугышын үтүчеләрнең күзләрендә дәһшәтле мизгелләр чагылып үткәндәй булды. Араларыннан Сергей Галяминский быел Әфганстанда булуына 35 ел тулуын искә алды. - Кундуз шәһәрендә без бер полкта ике ел дәвамында өч Зәй егете хезмәт иттек. Сер түгел, инде соңгы сулышым ахрысы дип уйлаган мизгеләр аз булмады. Дөрес, ир-егет өчен хәрби мәктәп үтү чын ир-ат булу өчен бик кирәк, тик ул чын сугышта сыналу булмасын, - дип киләчәк буыннарга үз теләген җиткерде Сергей. Соңыннан солист Андрей Иванов белән берлектә егетләр хәрби җырны аягүрә башкарып күңелләрне тетрәндерде.

Следите за самым важным и интересным в Telegram-канале Татмедиа


Нравится
Поделиться:
Реклама
Комментарии (0)
Осталось символов: