Зәй офыклары

«Китап» радиосы Татарстан белән Башкортстан буйлап авточабыш башлады

«Китап» радиосы Казан — Уфа — Казан авточабышын башлады.

Бүген Казанның 1 Май мәйданыннан «Китап» милли радиосының Татарстан һәм Башкортстан районнары буйлап «Мин матурлык эзләп йөрим…» дип исемләнгән авточабышы башланды. Авточабыш 28 октябрьгә кадәр дәвам итәчәк. Бу турыда "Татар-информ" МА хәбәр итә.

Чара барышында Татарстанның Мамадыш, Алабуга, Минзәлә, Актаныш, Азнакай, Әлмәт районнары, Чаллыда, Башкортстанның кайбер районнарында булу планлаштырыла.

«Китап» радиосы атрибутикасы белән бизәкләнгән яшел автобус билгеләнгән районнар буйлап узачак. Чарада катнашучылар 20-30 минутлык чыгышлар ясаячак. Анда «Китап» радиосы алып баручысы һәм башкарма продюсеры Лилия Кадырова шигырьләр укып, «MINGAZOV» кавер төркеме һәр татар һәм башкорт кешесенә таныш җырлар башкарачак.

 - Әлеге кичәне беренче чиратта Казанда тәкъдим иттек. Ул вакытта тамашачы безне бик җылы кабул итте. Башка район һәм шәһәрләргә дә чакырдылар. Аллага тапшырып, өч көнлек юлга кузгалабыз, — ди Лилия Кадырова.

«Мин матурлык эзләп йөрим…» дип исемләнгән авточабышның максаты: татар әдәбиятын, традицион музыкаль сәнгатен популярлаштыру, Татарстан һәм Башкортостан арасында дуслык җепләрен ныгыту, башкорт һәм татар халыклары арасындагы меңьеллык милли-мәдәни уртаклыкларны ассызыклау, милләтебезнең әдәби-мәдәни кыйммәтләрен пропагандалаучы «Китап» радиосын популярлаштыру.

- Гасырлар буена бергә дус булып яшәгән күршеләр — башкорт һәм татар мәдәниятенең никадәр якын булуын, тыңлаган җырларыбыз, сөйләгән шигырьләребезнең никадәр уртак булуын күрсәтергә телибез. Без бер үк җырларны тыңлап, бер үк шагыйрьләр, язучылар иҗатында тәрбияләнгән кешеләр, — ди «Китап» радиосының баш мөхәррире, «Татмедиа» акционерлык җәмгыяте җитәкчесенең радиотапшырулар буенча урынбасары Алмаз Миргаязов.

Авточабышта катнашучыларны Казаннан Сәидә Мөхәммәтҗанова һәм массакүләм мәгълүмат чаралары озатты. Ә «Татар-информ» хәбәрчесе Гадел Әхмәтҗанов чарага кушылып, үзе дә Казан-Уфа-Казан маршрутында катнаша. Ул автотурның һәр ноктасыннан яңалыклар белән уртаклашачак. Чараны «Интертат»ның Инстаграм сәхифәсендә дә күзәтеп бара аласыз.

 

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Реклама
Комментарии (0)
Осталось символов: