Өйрәнүләр үтте

«Шатлык» халыкка социаль хезмәтләр күрсәтү үзәгенең тернәкләндерү бүлегендә янгын була калганда, кешеләрне һәм хезмәткәрләрне эвакуацияләү буенча практик өйрәнү чарасы үткәрелде. Ул өч этаптан торды. Беренче ике этапта хезмәткәрләр белән теоретик һәм практик шөгыльләр алып барылды. Тренировкаларда янгын күзәтчелеге бүлегенең баш белгече дә катнашты. Практик өлештә 3нче катта янгын чыгуы турында хәбәр бирелде. Янгын янәсе электрүткәргечтә төзексезлек нәтиҗәсендә килеп чыккан. Моны психолог С. Столярова күреп алып, мөдиргә хәбәр итә. Ул, үз чиратында, «01» хезмәтенә шалтырата. Тиз арада үзәктә ял итүчеләр, хезмәткәрләр эвакуацияләнә. Әлеге чара белән җитәкчелек итүче С. Сало әзерлек һәм эвакуацияләү эшләренә нәтиҗә ясады, коллективның оешкан төстә, сигнал буенча тиешле урында җыелуын билгеләп үтте.