Зәйнең үзәк китапханәсендә тату һәм пирсинг хакында сөйләштеләр

Заманча мода үз яңалыкларын тормышка бик тиз кертә. Тәннәрне бизәү  һәрвакыт модада булды. Татуировкалар яшьләр мохитендә елдан-ел популярлаша бара.

Элек алар тоткыннарның домены иде. Ләкин пирсинг һәм татуировкалар шулай куркынычсызмы? Бу сәламәтлек өчен файдалымы? Бу һәм башка мәсьәләләр турында " Кеше. Канун. Хаклык” клубының чираттагы дәресендә сөйләштеләр.

Китапханәче Зөлфия  Гыйльманова балаларны татуировкалар һәм пирсингның барлыкка килү тарихы белән таныштырды, аларның борынгы дөньяда һәм урта гасырларда аерым мәгънәләре турында сөйләде.

Тату билгеле бер кабиләгә, нәселгә, социаль бәйләнешкә, гаилә торышына карый, яклау яки хәтта җәза булып хезмәт итә. Хәзерге дөньяда татуировкаларның күп төрләре бар. Әлеге "бизәнү әйберләре" нең тәндә куркынычсызлыгы турындагы мәсьәлә балаларны уйланырга мәҗбүр итте. Чөнки бу процедура стериль булмаган  препаратларны еш куллану аркасында инфекцияләр, бөер ялкынсынуы, В һәм С гепатиты һәм ВИЧ-инфекция алу куркынычы бар. Чарада "Пирсинг һәм татуировкаларның кеше организмына йогынтысы”  дигән  видеоролик күрсәтелде. Балалар бирелгән темага анкета сорауларына җавап бирделәр.

-Укучылар пирсинг һәм тату турында кирәкле мәгълүматлар алды. Тәнгә аларны ясатканчы башта яхшылап уйларга кирәклеген аңладылар. Модага ияреп кенә үзеңне корбан итәргә кирәк түгел,- ди Зөлфия Гыйльманова.