Баш тартмау зарур

20-27 апрельдә Европада иммунизация атналыгы үтә.

Иммунлаштыру - ул төрле йогышлы чирләрдән саклану, аларга каршы торучанлыкны көчәйтү дигән сүз. Медицинада ул вакцина ясату булып тора. Мондый ысул белән профилактикалау кайбер авыруларның бөтенләй юкка чыгуына китергән. Мәсәлән, элек полиомиелиттан меңәрләгән кеше интеккән. Дөньяда планлы төстә дифтерия, коклюш, кызамык, паротит эпидемиясе, В гепатитына һ.б.га каршы ясала торган вакциналар ел саен җир йөзендәге 3,5 миллион кешенең сәламәтлеген саклап калырга ярдәм итә.

Шәһәр-районда соңгы 15-20 елда дифтерия, кызамык, полиомиелит авырулары теркәлү очраклары күзәтелми, дип белдерә санитар табиблар. Шуңа күрә йогышлы авырулардан саклану өчен вакытында вакцинация ясатудан баш тартмау зарур.