"Казан" һәм "Бигеш" аэропортларын тизйөрешле тимер юл белән тоташтырырга ниятлиләр

"Казан" һәм "Бигеш" аэропортларын тизйөрешле тимер юл белән тоташтырырга телиләр, дип "Татар-информ" МА Татарстан Республикасы Транспорт һәм юл хуҗалыгы министры Фәрит Хәнифов хәбәр итте.

"Россия Тимер Юллары" ААҖ идарәсе "Казан" аэропортыннан "Бигеш"кә кадәр тизйөрешле тимер юл төзү турында документ кабул итте", – дип сөйләде транспорт министры.

Аның сүзләренә караганда, әлеге маршрут буенча 1 сәгать 15 минутта барып җитәргә мөмкин булачак. Проектны 2027 елда тормышка ашыра башларга планлаштыралар.

Фәрит Хәнифов, тизйөрешле тимер юл проекты Мәскәү – Казан югары тизлекле магистрале төзелеше планнары белән бәйле түгел, дип ачыклык кертте. «Бу югары тизлекле магистральнең аерым тармагы кебек булачак», – дип өстәде ул.

Татарстанның ике аэропорты арасында тимер юл элемтәсе мөмкинлекләре турында сөйләгәндә, ТР Транспорт министрлыгы башлыгы шәһәр эчендәге тимер юлны үткәрү шактый катлаулы, ә Казан аэропортыннан алып шәһәр үзәгенә кадәр ул салынган инде, дип билгеләп үтте.

«Татарстанда Әлмәт һәм Казан, шулай ук Казан һәм Яр Чаллы тимер юлын турыдан-туры бәйләү мәсьәләсе һәрвакыт куелды. Әгәр Россия тимер юллары идарәсе кабул ителгән документны эшләп чыгарса, якындагы елларда без шундый перспективаны карарага ниятлибез», – дип ассызыклады министр.

Татарстан территориясе буенча тимер юлларның озынлыгы якынча 2 мең км тәшкил итә.