Менә, ичмасам, бәрәңге!

Быел кайберәүләр бәрәңге уңышының начар булуыннан зарлана. Яңгыр вакытында яумау сәбәплеме, сортына ел килешмәү нәтиҗәсендәме чыннан да икенче икмәкне үстерүдән канәгать булмаучылар аз түгел. Ә менә Зәйдә яшәүче Валентин Судоргин моңарчы күрелмәгән эре-эре бәрәңгеләр үстереп шаккатырды шәһәрдәшләрен. Бер төптән алынган бәрәңге уңышы белән уртаклашырга ул редакциябезгә дә килде.

75 яшьлек пенсионер «Уңыш" бакчачылык ширкатендәге 4 сутый җирдән 12 капчык бәрәңге уңышы алган. Ә бер төптән 5 данә бәләк-бәләк бәрәңге алганын ул әле моңа кадәр хәтерләми. Иң зурысын кызык өчен үлчәп карадык. Озынча бәрәңгенең буе 24 см. , авырлыгы 1 кг. 400грамм. Валентин Судоргин көздән Волгоград ягыннан кайткан бәрәңге сатып алуын һәм яз көне шуның бер өлешен утыртуын әйтә. Бернинди дә ашламалар кулланмый пенсионер, ә менә җае чыкканда су сиптерергә тырыша. Нәтиҗәсе күзгә күренеп сөендерә аны.