Рөстәм Миңнеханов: «фейк-һәҗүмгә каршы көрәштә матбугатның роле бик зур»

Махсус хәрби операция кысаларында һәм Россиягә басым ясау шартларында массакүләм мәгълүмат чараларының роле арта, дип билгеләп үтте ул Россия Федерациясендә Татарстан вәкаләтле вәкиллеге каршындагы медиаклуб утырышында.

Үзебезнең гаммәви мәгълүмат чаралары аша махсус операциянең сәбәпләре һәм азат ителгән территорияләрдә башкарыла торган бурычлар турында дөрес, чын мәгълүмат җиткерергә була, дип саный Миңнеханов. «Бик күп ялган һәм мәгълүмати һөҗүмнәр. Монда матбугатның роле бик зур. <...> Россиягә каршы көрәш бара, бу бик начар. Аның каравы без импортны алыштыруга нинди участоклар кирәклеген күрдек, партнерыбыз кем икәнен, һәм юлдашыбыз кем икәнен аңладык. Боларның барысын да без кичерәчәкбез, дәүләтебез тарихында без моны уздык инде. Бу катлаулы чорда без бердәм булырга тиеш», – дип мөрәҗәгать итте ТР Президенты утырышта катнашучыларга.

Ул шулай ук очрашуны оештыручыларга, массакүләм мәгълүмат чаралары вәкилләренә һәм Татарстанның Россия Федерациясендәге тулы вәкаләтле вәкиллегенә нәтиҗәле эшләре өчен рәхмәт белдерде. "Сез күп файдалы эшләр башкарасыз, проектларны гамәлгә ашырасыз һәм безнең республика өчен һәрвакыт җан атасыз. Бу бик мөһим, без һәрвакыт бу ярдәмгә мохтаҗ", - дип нәтиҗә ясады Татарстан Президенты.

Дискуссия тәмамлангач, Миңнеханов нәтиҗәле хезмәттәшлек һәм республиканың социаль-икътисади потенциалын ныгытуга зур өлеш керткән өчен бүләкләр, шул исәптән – «Дуслык» ордены, «ТР алдындагы казанышлары өчен» ордены медале, «ТАССРның 100 еллыгы» медале һәм башкалар тапшырды.

Татарстан Президентының Мәскәүгә визитының тагын бер мөһим аспекты - Татарстан Республикасы Мәдәният министрлыгы белән Дәүләт Третьяков галереясе арасында хезмәттәшлек турында килешүгә имза кую булды. Документ республика белән илнең иң эре музейларының берсе арасында мәдәни өлкәдә хезмәттәшлекне киңәйтү буенча этаплап планны беркетте.