Зәйдә пенсионерлар йөзеп ярыша

Зәйдә пенсионерлар белән эшләүгә игътибар зур. Спорт һәм туризм идарәсе ел да алар арасында чаңгы һәм йөзү буенча ярышлар оештыра. Өлкәннәр көне уңаеннан спорт сәламәтләндерү үзәгендә бүген йөзү буенча шәһәр беренчелеге узды. Йөзү спортын үз иткән, йөзүдән сихәтлек, күңел тынычлыгы алган өлкәннәр, үз яшьләренә карап, аерым төркемнәрдә көч сынашты. Хәрәкәттә бәрәкәт, йөзү безгә сихәт, дәрт-дәрман бирә, ә ярышлар безне очраштыра, аралашырга мөмкинлек бирә, диләр алар.