Зәйдән – Алексей Ревин

19-23 мартта Казанда "Ел укытучысы - 2012" республика һөнәри бәйгесе үтә. Анда районнарда җиңү яулаган 50 педагог катнаша. Зәй данын 4нче мәктәптән физкультура һәм тормыш иминлеге нигезләре дәресләрен алып баручы Алексей Ревин яклый. Бәйгенең беренче этабында ул ачык дәрес һәм методик семинар, әти-әниләр җыелышы күрсәтте. Конкурска нәтиҗә 23 мартта Г. Тукай исемендәге Татар дәүләт филармониясе бинасында ясала. Абсолют җиңүчегә - 200, икенче һәм өченче урыннарга 80 һәм 50 мең сум күләмендә акчалата бүләк тапшырылачак.